BhaktiVed
Venkateswara

Veduka Kaditadu Vittaleshudu

SankirtanaAuthor: అన్నమాచార్య (Annamacharya)రాగం రామక్రియ
Script
Text size

This text needs editorial review.

Editorial review · Needs review

The recorded review date is shown when available. Script conversion is not translation; traditional versions may differ.

వేడుకకాఁ డితఁడు విట్టలేశుఁడు

వీడని పొందులు సేసీ విట్టలేశుఁడు

పల్లవి

వెన్నదిన్న మదమున వెలఁదులుఁ దానును

వెన్నెలలో నాడీ నిదె విట్టలేశుఁడు

పన్ని రతుల కింతులఁ బాంచజన్యరవమున

సన్న సేసి పిలిచీని సారె విట్టలేశుఁడు

॥వేడు॥

ఆసపడి కొలువులో నాడువారి మీఁదట

వేసీ విరులఁ గొని విట్టలేశుఁడు

వేసరక పదారువేలు సతులయిండ్ల

సేసవెట్టి పెండ్లాడీఁ జేరి విట్టలేశుఁడు

॥వేడు॥

మెల్లనె గందమిచ్చేటి మెలుతను గాఁగిలించి

వెల్లవిరిగాఁ గూడె విట్టలేశుఁడు

యిల్లిదె శ్రీవేంకటేశుఁ డితఁడె తానై వుండి

యెల్లగాఁ గోనేట వరాలిచ్చె విట్టలేశుఁడు

॥వేడు॥590

No video for this text yet.Search on YouTube

Meaning and notes

వేడుక కాడితడు విట్టలేశుడు – అన్నమయ్య కీర్తనలు

రామక్రియ

అవతారిక:

వేడు కాడంటే నేటి పరిభాషలో ‘జల్సారాయుడు’ అన్నమాట. అట్లాంటి ఈ విట్టలేశుడు వీడని పొందులు సేసీ నంటున్నారు. అన్నమాచార్యులవారు. మెలత యొకతె మెల్లగా గంధమియ్యబోయిందట. ఈ విట్టలేశుడు వూరకుంటాడా? వెల్లవిరిగా ఆమెను కౌగలించి కూడినాడట. ఆ సంతోషంలో కోనేటి ఒడ్డున యెల్లగా వరాలిచ్చేస్తున్నాడట. అంతే కాదండీ ఈ విట్టలేశుడే ఆ శ్రీవేంకటేశ్వరుడూనూ అంటున్నారు. పండరంగి విట్టలునిపై చక్కటి సరస శృంగార కీర్తన ఇది. ఇదే బ్రహ్మానందం. అవునా?

భావ వివరణ:

ఓ భక్తులారా! ఈ విట్టలేశుడు గొప్ప వేడుకకాడు (విలాసపురుషుడు). ఈయన వీడని పొందులు సేసి (విడుపులేని రతి కూటములు గల శృంగార పురుషుడు).

ఈ విట్టలేశుడు వెన్నలనారగించి. అటు పిమ్మట సంతోషముతో పండువెన్నెలలో వెలదులతో (రమణులతో) ఆడిని రాసక్రీడల దేలినాడు. రతుల కొరకు ఈయన ఇంతులను, పన్ని (పన్నుగడతో) పాంచజన్య శంఖానాదము సంకేతముగా, సారెకు (ప్రతిసారీ) సన్నసేసి (సైగజేసి) పిలిచీని (పిలుస్తాడు). ఎంత టక్కరివాడో చూడండి.

ఈ విట్టలేశుడు ఆసపడి (వ్యామోహము కలవాడై) అంతమంది స్త్రీల గుంపులోనున్న ఆడువారిపై కూడా విరులవేసి (పూవులను జల్లి) తన వశము చేసికొంటాడు. వేసరక (విసుగు అనే మాటలేక) పదియారువేలమంది సతుల ఇండ్లలో, సేసవెట్టి (అక్షతలు జల్లి) మరీ వారిని పెండ్లాడినాడు. (ఇందులో పెండ్లాడాలనే కోర్కె ఇంతులదే సుమా!) స్వామికి యేనాడు, యెవరిపైనా, యే కోరికా వుండదు. ఎందుకంటే ఆ దేవదేవుడు నిరంజనుడు, అవునా?

ఈ కొంటె కోణంగి ఇంకా యేమిచేస్తాడో తెలుసా? తనకు గంధము పూస్తున్న పడతులను మెల్లగా సందిటజేర్చి వెల్లవిరిగా (విజృంభించి) కూడి ముచ్చట దీరుస్తాడు. ఇల్లిదే (ఇదే) శ్రీవేంకటాద్రిపై శ్రీ వేంకటేశుడైన ఇతడే నేడు ఈ కోనేటి ఒడ్డున విటలేశుడై యెల్లగా వరాలచ్చీ (అంతులేని వరములనను గ్రహించుచున్నాడు).

Also read