Namo Namo Dasharathanandana Mammu Rakshinchu

SankirtanaAuthor: అన్నమాచార్య (Annamacharya)రాగం మాళవశ్రీ (annamacharya sankirtana no. 301)

This text is still being proofread.

నమో నమో దశరథనందన మమ్ము రక్షించు

కమనీయ శరణాగతవజ్రపంజరా

పల్లవి

కోదండదీక్షాగురుఁడ రామచంద్ర

ఆదిత్యకుల దివ్యాస్త్రవేది

సోదించుమారీచునితలగుండుగండ

ఆదినారాయణ యసురభంజనా

॥నమో॥

ఖరదూషణశిరః ఖండనప్రతాప

శరధిబంధన విభీషణవరదా

అరయ విశ్వామిత్రయాగసంరక్షణ

ధరలోన రావణదర్వాపహరణ

||నమో||

పొలుపొంద నయోధ్యపురవరాధీశ్వర

గెలుపుమీరిన జానకీరమణ

అలఘుసుగ్రీవాంగదాదికపి సేవిత

సలలిత శ్రీవేంకటశైలనివాసా

||నమో|| 301

Meaning and notes

నమో నమో దశరథనందన మమ్ము రక్షించు – అన్నమయ్య కీర్తనలు

మాళవశ్రీ

అవతారిక:

భావ వివరణ:

దశరథనందునడవైన ఓ శ్రీరామచంద్రా! నమో నమో! నీకు వేలకొలది వందనములు. మమ్ము రక్షింపుము తండ్రీ! నీవెవ్వరివి ప్రభూ “కమనీయ శరణాగత వజ్రపంజరుడవు” (నీ శరణార్థులకు మనోజ్ఞమైన వజ్రపు కవచము వంటి రక్షకుడవు).

ఓ రామంచంద్రా! నీవు నీదాసులు రక్షణకై యెప్పుడూ కోదండమును ధరించియే వుంటాను, అనే దీక్ష నిర్వహించిన దీక్షితుడవు. ఆదిత్యకులములో (సూర్య వంశములో) జన్మించిన సకల శస్త్రాస్త్రపారంగతుడవు. మాయలేడివలె వచ్చిన మారీచుని సోదించు (వెదుకునట్టి) తలగుండు గండవు (శిక్షగా తలపై పెట్టుకొని తిరిగే పెద్దబండ వంటి మొనగాడివి). అంటే మారీచునివంటి కపటుల పాలిటి యముడివి అని భావము.

కీర్తితో అయోధ్యాపురాధీశ్వరుడవై యేలిన చక్రవర్తివి. గెలుపుమీరిన (కీర్తికాంత, భూకాంత, శ్రీకాంతలను కూడా గెలిచిన) జానకీరమణుడవు. కపిసేనలో అలఘులైన (ఉద్దండులైన) సుగ్రీవుడు అంగదుడు మొదలైన వారందరిచే సేవించబడినవాడవు. ఇంతే కాదు స్వామీ! నీవు సలలితము (దివ్యసౌందర్యోపేతమైన) శ్రీవేంకటశిఖర నివాసివైన మా దైవము శ్రీవేంకటేశ్వరుడవూ నీవే.

Source: bhaktived.com, https://bhaktived.com/namo-namo-dasarathanandana-mammu-raksincu/

Also read

Brahmamokkate ParabrahmamokkateSankirtanaRead

Shrinivasa Govinda Shri Venkatesha Govinda (govinda Namalu)KirtanRead

Adivo Alladivo ShriharivasamuSankirtanaRead

Kondalalo Nelakonna Konetirayadu VaduSankirtanaRead

Nanati Batuku NatakamuSankirtanaRead

Alarulu Kuriyaga AadenadeSankirtanaRead