BhaktiVed
తెలుగుहिंदीEnglish
వేంకటేశ్వరుడు

శ్రీ వేంకటేశ్వరుడు శ్రీయలమేల్మంగతోడ

సంకీర్తనరచన: అన్నమాచార్య (Annamacharya)రాగం సాళంగనాట (annamacharya sankirtana no. 240)

ఈ పాఠం ఇంకా సరిచూడబడలేదు.

శ్రీవేంకటేశ్వరుఁడు శ్రీయలమేల్మంగతోడ

కోవిదుఁడై విహరించీ కోడతిరుణాళ్లు

॥పల్లవి||

వెల్లవిరిగా వీధుల వెన్నెలలు గాయఁగా

చల్లని పూవులవాన జడి మించఁగా

వొల్లనే సతులు దన్ను వుగ్గళించి పొగడఁగా

కొల్లలాడీ వలపులు కోడతిరుణాళ్లు

||శ్రీవేం||

ఆటల పాటలవాఁడు అండనే వినిపించఁగా

పాటించి యారగింపులు పైపైఁ జేయఁగా

గాఁటముగ వీడెములు గందములు నందుకొంటా

కోటిభోగాలు భోగించీ కోడతిరుణాళ్లు

||శ్రీవేం||

చేరి పన్నీరు కప్రము శిరసునఁ గులుకఁగా

వూరక యిందరు కొలువులు సేయఁగా

యీరీతి శ్రీవేంకటేశుఁ డిందరుసతులఁ గూడి

కోరికలు వెదచల్లీ కోడతిరుణాళ్లు.

||శ్రీవేం||240

ఈ పాఠానికి వీడియో లేదు.YouTubeలో వెతకండి

భావం / వివరణ

శ్రీ వేంకటేశ్వరుడు శ్రీయలమేల్మంగతోడ – అన్నమయ్య కీర్తనలు

సాళంగనాట

అవతారిక:

‘కోడతిరుణాళ్ళు’ అంటే వసంతోత్సవ అని అర్థం. శ్రీవేంకటేశ్వరుడూ ఆయన దేవేరి అలమేల్మంగ వసంతోత్సవంలో పాలుపంచుకొంటున్నారట. ఆ దృశ్యాన్ని కళ్ళకు కట్టిస్తున్నారు అన్నమాచార్యులవారు. స్వామి వసంతాలు చల్లుటయేకాదు శృంగారవనంలో కోవిదుడై విహరిస్తున్నాడట. అంటే ఆరితేరినవాడై వసంతాలాడుతూ విహరిస్తున్నాడన్నమాట. అసంఖ్యాకమైన సుందరాంగులతో ఆ శ్రీవేంకటేశ్వరుడు కోరికలు వెదచల్లే కోడతిరునాళ్ళు ఆడుతున్నాడట. ‘కప్రము’ అంటే కర్పూరము అని అర్థం. పన్నీరు కర్పూరము బాగా కలిపి తలమీద పోసేవారట ఆ రోజుల్లో.

భావ వివరణ:

శ్రీవేంకటేశ్వరుడు శృంగారపురుషుడు. తన దేవేరి అలమేల్మంగతో ఆయన కోవిదుడై (ఆరితేరిన నేర్పరివలె) కోడతిరుణాళ్ళు (వసంతోత్సవము) జరుపుకొంటూ విహరించీ (విహరించుచున్నాడు.). ఆ వైనం తిలకించండి.

ఆ తిరువీధులలో వెన్నెల వెల్లివిరిసి కాస్తున్నది. ఎవ్వరూ చల్లకనే పూవులవాన జడి (జల్లు) లాగా కురుస్తున్నది. ఆ వసంతోత్సవంలో పాల్గొంటున్న స్త్రీలందరూ తనను వుగ్గిళించి పొగడగా (తన పక్షాన ఉత్తేజ పరుస్తూ పొగుడుతుంటే) ఆ దేవదేవుడు ఆమె వలపులను కొల్లలాడీ (అపహరించాడు). స్వామి కోడతిరుణాళ్ళు అంత చూడ ముచ్చటగా వున్నది.

కొంతమంది అక్కడ ఆడుతున్నారు (నృత్యం చేస్తున్నారు). కొంతమంది మధురంగా గానం ఆలపిస్తున్నారు. వారు అండనే (ఇంటిలోనే) వున్నారు, మరి అంత జోరుగా వసంతాలాడితే ఆలిసిపోయి ఆకలివేస్తుంది కదా! స్వామి అప్పుడు పాటించి (ఆదర పూర్వకంగా కాసేపు విశ్రాంతినిచ్చి పైపై ఆరగింపులు (తేలికపాటి ఆహారం) తీసికొనినాడు. గాటముగా (అధికముగా) వీడెములు తాంబూలములను స్వీకరించాడు. గంధము పూతలు గ్రహించాడు. కోటి భోగాలు (అసంఖ్యాకమైన భోగములను) భోగించాడు. ఆ వసంతోత్సవం కన్నుల పండువగా వున్నది.

ఆహా!! ఎంత అద్భుతమైన దృశ్యమది!! వారి (స్వామివారు ఆయన దేవేరి) శిరసున (తలలమీద) చేరి (స్త్రీలందరూ కలిసి) పన్నీటిలో కలిపిన కప్రము (కర్పూరమును) గులుకగా (కుమ్మరించగా వీరంతా స్వామివారి కొలువుకూటమిలో చేరారు. ఈ విధంగా శ్రీవేంకటేశ్వరుడు ఇంతమంది సతులగూడి (సుందరాంగులతో కూడి) వసంతాలాడుతుంటే స్వామిపై కోరిక కలుగనిదెవరికి చెప్పండి. ఆ విధంగా ఆ మనోహరుడు కోరికలు వెదచల్లుతుండే కోడతిరుణాళ్లు ఆడుతున్నాడు.

మరిన్ని అన్నమయ్య కీర్తనలు:

మూలం: bhaktived.com, https://bhaktived.com/sri-venkateswara-sriyalamelmangathoda/

ఇవి కూడా చదవండి

బ్రహ్మమొక్కటే పరబ్రహ్మమొక్కటేసంకీర్తనచదవండి శ్రీనివాసా గోవిందా శ్రీ వేంకటేశా గోవిందా (గోవింద నామాలు)కీర్తనచదవండి అదివో అల్లదివో శ్రీహరివాసముసంకీర్తనచదవండి కొండలలో నెలకొన్న కోనేటిరాయడు వాడుసంకీర్తనచదవండి నానాటి బతుకు నాటకముసంకీర్తనచదవండి అలరులు కురియగ ఆడెనదేసంకీర్తనచదవండి